《足球小將》舞台劇 六師弟亂入?

作者:Jamie    發表日期:2017-07-11 13:07:02

早前已經預告,今年8月,日本會有《足球小將》舞台劇公映,仲標榜有「體感」Gimmick,不過講到幾誇都好,最緊要都係演員嘅還原度有幾高先?純粹以事論事,唔係人身攻擊,當時小編已經對真人版次藤洋……感覺怪怪哋,似《少林足球》嘅六師弟多啲囉;無論漫畫或動畫,次藤都係高大、健碩,唔係肥囉!最近製作單位喺YouTube發表咗「男一」戴誌偉以外嘅多位角色短片,當中包括次藤洋,身形依舊冇收身,仲出埋肚腩擋波,似足《少林足球》嘅三師兄「鐵布衫」,唔通舞台劇嘅總導演(總合演出)EBIKEN蛯名健一係《少林足球》鐵粉,於是將次藤洋變成三師兄加六師弟嘅混合體?

令人感覺崩壞嘅,唔隻次藤洋,其他角色都係驚多過喜,例如泰萊(岬太郎)太重脂粉味、林源三(若林源三)嘅笑容太有自信變到奸奸哋、小誌強(日向小次郎)唔夠大隻膚色又唔夠黑,反而人氣唔算高嘅早田誠就最有原著神髓。另一方麵,從今次嘅短片嚟睇,相信劇中球來球往嘅動作畫麵,會以動畫特技交待,接受與否就見仁見智了。雖然人設方麵好似出事,不過又唔係冇期待位,事關同步另一短片,見到飾演立花兄弟嘅廣野淩大及大曾根敬大,正在努力練習「一飛衝天彈跳射球」,矚目度分分鐘高過猛虎射球喎!


本文來源:http://hk.on.cc/hk/bkn/cnt/lifestyle/20170711/bkn-20170711073058770-0711_00982_001.html




Tag:
本文鏈接:http://www.wedding724.com/18619.html