電玩吹兩嘴:必玩!足球小將~奮戰夢幻隊~

作者:Flower    發表日期:2019-08-14 03:34:34

電玩吹兩嘴:必玩!足球小將~奮戰夢幻隊~

嘩!真係咩童年回憶都番晒嚟呀!講起今期全城熱爆手遊,一定要數新鮮上架,由日本KLab Games炮製的《足球小將~奮戰夢幻隊~》喇!如果閣下曾經歷過紅白機時代指令式玩法《足球小將》的話,相信好快會投入其中。呢款遊戲電‧競女都有玩,仲首抽5星麥泰來,唔知你哋又抽咗咩陣容,不如出嚟切磋下球技啦!

《足球小將~奮戰夢幻隊~》的最大賣點在於玩家能夠收集球員來創建屬於自己的「最強11人」,挑戰故事劇情或者和其他玩家隊伍。不同於傳統足球遊戲要全手動操作球員,玩家只須賽前揀好陣式和擬定戰術,系統就可以作半自動甚至自動作賽,當然,玩家亦可充當司令塔,親嘗停傳帶射。當運球選手靠近對方時就會觸發「對決」指令畫面,攻方可選「射門」、「傳球」、「One-Two」或「直接過人」,而守方可選「阻擋」、「攔截」或「鏟球」,另外,球員發動必殺技時更有精彩動畫,配合全語音演出,都係熱血到暈呀!建議大家刷首抽最好是5星前鋒或5星門將,目標當然是瞄準小志強或者林源三,而遊戲最貼心就是刷唔啱心水可以重刷,咁就唔使狂刪Game咁麻煩啦。

講起近期人氣手遊仲有MMORPG玩法嘅《天堂II》,不過韓國出品又點只得呢款咁少呢!同樣採用Unreal Engine 4遊戲引擎開發,GAMEVIL的《上古世紀:序》即日起Android版本經已作全球CBT封測,作品仲支援繁體中文介面,值得推薦呀!

自2013年起PC版MMORPG遊戲《ArcheAge》(上古世紀)風靡全世界,官方今年更索性將故事世界觀移植至手機版本,推出《ArcheAge:BEGINS》(上古世紀:序),顧名思義就是以前傳劇情作為遊戲主軸。從早前外國的試玩片段中可見,遊戲採用類似橫向捲軸的即時戰鬥,只是絕招施放的方式比較特別,就是指定目標,根據數字所標示的敵人來掃動角色卡片,同傳統點擊敵人鎖定再選項放招有所不同。另外英雄升級亦方便,玩家可綁定最高Level的角色,當練功升呢時就可以加快升級速度,遊戲仲提供生產和貿易系統,玩家可以製作道具放上網兜售賺錢。《上古世紀:序》Android版封測截至7月3日,想體驗遊戲記得上官網了解詳情啦。

講完日本和韓國手遊,鏡頭一轉同大家關注一下外國出品啦。上周E3電玩展Ubisoft發表了手遊《衰仔樂園:電話破壞狂》,並訂下今年內上架。遊戲結合即時戰鬥和集換式卡片機制,體驗蛋散、茂利、粉腸同碌葛的瘋狂歷險。

遊戲中玩家將再次扮演無名的「新來的小孩」,並且和衰仔樂園的眾多角色組隊,跟牛仔、海盜、改造人等進行全新的遊戲。玩家可以帶着自己的小隊展開提供原創故事的全新單人冒險。玩家需鍛鍊出一支實力堅強的隊伍,以發揮他們取得的卡片的真正威力。劇情方面,又點少得原汁原味呈現原著電視節目的笑點呢,遊戲仲請來原班配音人馬聲演,粉絲實無投訴呀。


本文來源:http://hk.on.cc/hk/bkn/cnt/lifestyle/20170624/bkn-20170624121425401-0624_00982_001.html




Tag:
本文鏈接:http://www.wedding724.com/16285.html